Rev 8 | BEF | STEP | Ya hulago sipisipi nala'auba ai pepa naga'i napa 7 i hepulu tito paka so'ehina. Ya nohigo kokulumagu ka mekoko tito ni'igo kana hupamone'i nobigo

Revelation of John 8

Pepa naga'i napa 7 i hepulu tito paka so'ehina

1 Ya hulago sipisipi nala'auba ai pepa naga'i napa 7 i hepulu tito paka so'ehina. Ya nohigo kokulumagu ka mekoko tito ni'igo kana hupamone'i nobigo 2 yamofihi su nohago agelo 7 enali Hu'mamofihi maha'aluga ho tilete nehago bu enogo'ohuna. To pikuli 7 epigo lila lila hite mine'ahana.

3 To agelo moneuba tu'a hiti nasana mamufa gilata lape'i golitu lolo hi'ahana nasana hiti liloto o'ehina. Oto mamufa gilata hitamofihi maha'aga ya'ma ho tiloto mino'ehina. Ana kegi'a tu'a hiti nasana lamana'a babu lite ya'ma lime emilago sekele mamu'a hiti kefa hisamofihi gobisalo ya'ma mamufa gilata nasana to golitu lolo hi'ahana minoto yamofihi gupisalo tu'a hiti nasana mone laita huto mono bona'magihi Hu'mamofitoga nunumu lilata nehana yalo'i molo emi epolo'ehina. 4 Ya nohigo agelo ai yaha'a su to'ehinaguti lokiya tu'a hiti yanauba mono bona'i enali Hu'mamofitoga nunumu lite neminana'amagihi molo emi epalago Hu'mamofitoga ti'ehina. 5 To agelo ai ya suhi huloto mamufa gilata hitaloti logomofihi lokunusa'a liloto lapelugu molo bai toloto melugu li fulugu bi he'migo limi'ehina. Nolimigo kokililika sipi noligo fato nogo'ani hiti noligo kopisi'na li melebeya nohigo imima'i mone'i li'ehina.

Agelo 7 enali pikuli 7 fu li'ahana

6 Ya nohigo agelo 7 enali pikuli lite mine'ahana yamagi pikuli fu lilune'mu le'mo keta mehuse hite mine'ahana.

7 Ya hulago agelo kohe'auba ai ya'ma pikuli fu lulago ko'i hogisopa legeya'a to logomofihi lokunusa'a lito gola hiti li sibi sibi hi'ahana yauba melugu mo i'ehina. Noigo melugu kupa'a loebe monebe fi loko hite nehago kupa'a monelugu ya'ma yafa logouba lo su ho'ehina to kupa luga'a ya'ma kifi kosaba'i asaga'i logouba lo su ho'ehina.

8 To agelo aliha'a napa 2 ai pikuli fu noligo nasana mone sipi kosagu ana suhi huto logo guluya meha'a hiti hege nagamilugu i fekele lito limi'ehina. Limilago hege nagami'i fi loko huto loebe monebe hulago mone'i golako lolo hu'ehina. 9 Hege nagamilugu fato fato nasana fi loko huto loebe monebe lolo higo monelugu ya'ma ana'ina fili gehesa hi'ahana to ana huto fi loko huto loebe monebe lolo higo mone'a nagamilugu botimo ya'ma ibe tigibe hu'ehina.

10 To agelo napa 3 ai pikuli fu noligo sonofi'i napa'a mone kokulumaguti itefe lito limi'ehina yauba libi'i ya suhi huto gulu gulu'a hiti limito loebe monebe lolo higo monelugu ipi opoho nagami'i hiti to biya nonuhu nagami'i hiti mone'agu folo'ehina. 11 Ana sonofi'i gi'a ya'ma Ofu'yau ekesa halibe nelana yabe. Nagami'i ya'ma fi loko huto loebe monebe hu'ehina mone'i ya'ma ekesa ho su hago bona'magi enali nelago ekesa'auba enahago fili su he'ahana.

12 Fili su nehago agelo napa 4 ai'a ya'ma pikuli fu noligo yege ikahi to sonofi'i yamagihi fana meha'ani fi loko huto loebe monebe hulago mone'mofihi fana meha'a su ho'ehina. Fana meha'ani nesi nohigo go'i fi taga hu epoloto go'i lu'ehina. To fuligagu yege nesi'a besa loloto to folugu'i ana huto ikahi sonofi'i fi taga hu epoloto fi besa nesi'a lo lito hu'ehina.

13 To nani nubu egolago buto nama lupahi sipi mone bu go'ohuna. Bu go'ohunana ya'ma muya beletoga kasa gito nohuto nogo sipi luto ma luto kehe i'ehina: Akae, akae. Agelo loebe monebe enali pikuli'ani fa'mene ma ni'ibe ya'ma fu linogo nogo melenogo melugu bona'i enali hena hena'ani hilana ni'ibe luto ligo keheli'ohube.